Posted by نووسینی : مسته‌فا شه‌ڵماشی
رۆژی حه‌وتی پوشپه‌ڕی۲۷۰۷ ی کوردی، بیست ساڵ به سه‌ر شیمیابارانی شاره جوانه‌که‌ی سه‌رده‌شت و چه‌ند دێیه‌کی ده‌روبه‌ری دا تێده‌په‌ڕێ، شاری سه‌رده‌شت و ده‌وروبه‌ری
هه‌میشه ناوه‌ندی کۆبونه‌وه‌ی ڕێبوارانی ڕێگای ئازادی کوردستان و سه‌رچاوه‌ی به‌خشینی هێزو توانا به جووڵانه‌وه‌ی ڕزگاریخوازیی گه‌له‌که‌مان له هه‌موو پارچه‌کانی کوردستان بووه.
ئه‌و ناوچه خنجیلانه‌یه که خاوه‌ن جوانیه‌کی سیحراوی سروشتیشه، وه‌ک دایکێکی نیشتمان په‌روه‌ر،هه‌زاران ڕۆڵه‌ی هه‌ڵکه‌وتوی له داوێنی پاکی خۆی دا په‌روه‌رده کرده‌وه و سه‌دان شه‌هیدی پایه‌به‌رزی له پێناوی سه‌رکه‌وتنی کورد و کوردستان دا پێشکه‌ش کرد‌وه. له هه‌ر گوندو چیاو دوندێکی ئه‌و ناوچه ئازادیخوازه بیر بکه‌یه‌وه، شه‌هیدێکی سورخه‌ڵاتی کوردستانت وه‌بیر دێته‌وه. شاری سه‌رده‌شت هه‌ر له”سه‌رکه‌نه‌کان” بگره تا”گرده‌سور” به خوێنی ڕۆڵه‌کانی پێشمه‌رگه و شیمیاباران ڕه‌نگاوه،ووشه‌ی تیرباران” شه‌هید کردنی مه‌لا ئاواره و ڕه‌حمان چاوشین و مه‌لا که‌چه وه‌بیر دێنێته‌وه که به‌ده‌ستی ڕێژیمی چه‌په‌لی پاشایه‌تی له سه‌رکه‌نه‌کان ئیعدام کران و کیمیاباران هه‌ڵوه‌رینی گیانی سه‌دان نه‌مامی تازه پێگه‌یشتوو، به هۆی بۆمبارانی شیمیایی یه‌وه ده‌خاته‌وه بیر.
ئه‌و ناوچه‌یه هه‌میشه داڵده‌ی شۆڕشگێڕانی کورد بووه، له هه‌ر چوارپارچه‌ی کوردستان و هیچ ڕێکخراوێکی سیاسی کوردی نه‌ماوه که سه‌رده‌مێک له ژیانی ئاواره‌یی و شؤڕشکێڕیی خۆی له‌و ناوچه‌یه دا به‌سه‌ر نه‌بردبێ و له ده‌ستی یارمه‌تیده‌ری خه‌ڵکی به وه‌فا و نیشتمانپه‌روه‌ری ئه‌و ناوچه‌یه که‌ڵکی وه‌رنه‌گرتبێ. به حه‌ق هه‌ڵده‌گرێ له‌قه‌بی” سه‌نگه‌رێ ئازادی کوردستان” بدرێ به ناوچه‌ی سه‌رده‌شت. ناوچه‌ی سه‌رده‌شت و ده‌وروبه‌رێ ته‌نانه‌ت داڵده‌ی شؤڕشگێڕی ئه‌وتویان داوه،که ڕێگای سه‌رکه‌وتنیان له چیاکانی ئه‌و ناوچه‌یه‌وه به‌جل وبه‌رگی پیرۆزی پێشمه‌رگایه‌تیه‌وه ده‌ست پێ کرد‌وه و ئێستاشی له گه‌ڵ بێ خه ڵکی سه‌رده‌شت و ده‌روبه‌ری داڵده‌ی شؤڕشگێڕانی به‌شه‌کانی دیکه‌ی کوردستان ده‌ده ن و به هه‌موو هێزیانه‌وه پشتیوانی له ده‌سکه‌وته‌کانی به‌شه‌کانی دیکه‌ی کوردستان ده‌که‌ن.
به خۆڕایی نییه، که دوژمنانی گه‌له‌که‌مان له هه‌ر به‌هانه‌یه‌ک ده‌گه‌ڕێن تا ڕقی خۆیان به‌و ناوچه نیشتمانپه‌روه‌ره و شاره خنجیلانه‌که‌ی سه‌رده‌شت بڕێژن. هه‌ر بۆیه له رۆژی ۷ی پوشپه‌ڕی۲۷۰۷ی کوردی دا دوژمنی سوێندخواردووی گه‌له‌که‌مان،رێژیمی فاشیستی به‌عسی ڕووخاو، ڕقی دێرینی خۆی به خه‌ڵکی سه‌رده‌شت و ده‌وروبه‌ری ڕشت و به هێرشێکی دڕندانه ی کیمیایی، واته به چه‌کی کۆمه‌ڵ کوژ سه‌دان که‌س له ژن و منداڵی و پیرو لاوی ئه‌و سه‌نگه‌ره له گیران نه‌هاتوه‌ی کوردستانی شه‌هید کرد و هه‌زاران که‌سیشی گیرۆده‌ی مه‌رگێکی له سه‌رخۆ کرد که ئێستاشی له گه‌ڵ بێ،پاش ته‌حه‌مول کردنی ده‌یان ساڵ ئازار و نه‌خؤشی گیان ده‌ده‌ن. ڕژیمی جینایه تکاری کوماری ئیسلامیش که ده ستی به خوێنی سه دان ڕۆڵه ی ئه و ناوچه یه سووره، نه ک ته نیا هه وڵی ساڕێژ کردنی برینی قوربانیه کانی ئه و جینایه ته سامناکه ی نه داوه، به ڵکو زۆرتر هه وڵی داوه به قازانجی ڕژیمه که ی که ڵکی ته بلیغاتی لێ وه ر بگرێ.
له ئه‌نجامی ئه‌و هێرشه دڕندانه‌یه دا، ئێستاش ته‌م ومژی بۆمبارانی شیمیایی به سه‌ر ناوچه جوانه‌که‌ی سه‌رده‌شته‌وه دیاره و هه‌موو ساڵێ له بیره‌وه‌ری ئه‌و ڕۆژه دا خه‌ڵکی ناوچه‌ی سه‌رده‌شت برینیان ده‌کولێنه‌وه و له هه‌ر جێگایه‌کی ئه‌و دنیا پان و به‌رینه دا بن، بۆنی سێویان به‌به‌رلوتی دا دێ و بۆ چه‌ند سه‌عا‌تێک به‌شداری له ئازاری قربانیه‌کانی چه‌کی کۆمه‌ڵ کوژی شیمیایی له ناوچه‌که‌یان دا ده‌که‌ن. قوربانیه‌کانی چه‌کی کۆمه‌ڵ کوژی شیمیاییش له شاری سه‌رده‌شت و ده‌ورو به‌ری تا ئێستاش له ژێر باری زؤڵمی داگیرکه‌رانی کوردستان و بێ ده‌نگی ڕێکخراوه نێونه‌ته‌وه‌ییه‌کانی جیهان له به‌رامبه‌ر ئه‌و تاوانه گه‌وره‌یه داچه‌ماون و له چاوه‌ڕوانی دان تا ڕۆژێک له ڕۆژان وه‌ک قوربانی چه‌کی کۆمه‌ڵکوژی بناسرێن و تارادده‌یه‌ک برینه‌کانیان سارێژ بکرێ و زیانه‌کانیان قه‌ره‌بو بکرێته‌وه. به‌ڵام مخابن تا ئێستاش ئاورێکی پڕ به‌پێستی ئه‌و جینایه‌ته له قوربانیه‌کانی کیمیایی سه‌رده‌شت و ده‌وروبه‌ری نه‌دراوه‌ته‌وه و برینه‌کانیان سارێژ نه‌کراوه.
له‌وه‌ش دڵته‌زین تر ئه‌وه‌یه که به‌داخه‌وه حیزب و رێکخراوه کوردستانیه‌کانیش هیچ گرنگیه‌کی ئه‌وتۆیان به‌و جینایه‌ته گه‌وره‌یه نه‌داوه و هه‌موو ئه‌وانه‌ی که رۆژه سه‌خته‌کانی خه‌باتی خۆیان له‌و ناوچه‌یه دا به‌سه‌ر بردوه، ئه‌و خه‌ڵکه له‌خۆبوور دوه‌یان له بیر بردوته‌وه و هه‌وڵێکی ئه‌وتۆیان بۆ ناساندنی ئه‌و جینایه‌ته گه‌وره‌یه‌ی ده‌رحه‌ق به‌و خه‌لکه تێکۆشه‌ر و به‌وه‌فایه کراوه، نه‌داوه. حه‌ق وابو ئه‌وانه‌ی له‌بن ده‌وه‌نه‌کانی ئه‌و ناوچه‌یه ڕا به لوتکه‌ی سه‌رکه‌وتن گه‌یشتوون و له‌سه‌ر ته‌ختی سه‌رۆکایه‌تی وه‌ڵاتێک یا هه‌رێمێک گیرساونه‌وه، یا پۆستی وه‌زیرو په‌رله‌مانتار و سه‌فیریان به‌ده‌ست هێناوه، ئاوڕێک له‌و قوربانیانه بده‌نه‌وه و هه‌ر نه‌بێ هه‌وڵ بده‌ن قه‌ره‌بوی زیانه‌کانیان بکرێته‌وه، که گیانه‌کانیان تازه بۆ ناگه‌ڕێته‌وه.
هیوادارم بیره‌وه‌ری ساڵوه‌گه‌ڕی بیسته‌می ئه‌و جینایه‌ته سامناکه ببێته هۆی وه‌خه‌به‌ر هاتنی هه‌موو لایه‌ک و ئاوڕدانه‌وه‌یه‌کی هه‌موو لایه‌نه به‌ره‌و قوربانیه‌کانی شاری سه‌رده‌شتی کوڵنه‌ده‌ر و ناوچه‌ی سه‌رده‌شتی هه‌میشه سه‌نگه‌ر.
۷ی پوشپه‌ڕی ۲۷۰۷- کانادا،له‌نده‌ن
–|::|هه‌ینی ۲۶ رێبه‌ندان ۱۳۸۶ – ۱۶:۳۰:۱۴