چه‌ند شێعرێک له‌ شێعره‌کانی مامۆستا شەریف حوسێن پەناھی

مامۆستا شه‌‌ریف حوسێن په‌ناهی ناسراو بە شه‌ریف سنه‌یی . مامۆستا شه‌ریف خه‌ڵکی شاری سنه‌یی ڕۆژهه‌ڵاتی کوردستانه‌ و دیوانێکیشی هه‌یه‌ به‌ناوی مڵوانکه‌ی شێن که‌ زیاتر له‌ سی شێعری له‌ خۆ گرتوه‌ و زۆربه‌ی شێعره‌کانی کراونه‌ گۆرانی وه‌ک ‌ گۆرانی” دایه‌گیان” و “کۆچه‌” . له‌ درێژه‌ی بابه‌ت دا سێ دانه‌ له‌ شێعره‌‌کانی دانراوه‌ و شێعرێکیشی هه‌یه‌ بۆ شه‌هیدانی ۳۰ی گه‌ڵاوێژ که‌ پێشتر له‌ کوردکاناڵ دا بڵاو کراوه‌ته‌وه‌ .

ملوانکەی شین: کۆچ

کۆچی کوردان وا بە کاروان دێ لە رێی شارانەوە
رۆژ بە باری قورس و برسی، شەو لە بەر بارانەوە
نیشتمانی خۆمە دەیپێوم، پێم دەڵێن ئاوارەیە
گەرچی بێ رەشماڵ و پێ خواس، سەر بە کۆسارانەوە
رێگە دوور و (خێڵ) ماندوو و لێوبەبار و پێ پەتی
چاو بە ئەسرین دێنە پیری کۆچەکەی یارانەوە
نایە سۆزی دەنگی گۆرانی ، ھەوارە و کۆچی سوور
کاروان گوێی داوە بە ناڵەی بریندارانەوە
بۆ مناڵێ تەرمی دایکی خۆی بە جێ دێڵێ و ئەچێ
ئاسمان دەگری، مەلان دەگرین بە سەر دارانەوە
دەنگی تۆپ و تیری دوژمن دێ لە شوێنی کۆچەوە
جێ ھەواران وا بە دەستی سووری زۆردارانەوە

:::::::::::::::::::::::::::::::::::::::::::::::::::

دایە گیــــان :  ملوانکەی شین

دایه گیان بگری له سەر خاکم کەوا شینم دەوێ
زۆر بگریێ دایه گیان فرمیسکی خوینینم دەوێ

من گولڵی سەد ئارەزوویی ژینم لە خاکا خەوتووە
خاکی مەیدانی خەبات ڕەنگینی خوێنی من بووە

دامەنیشە دایە گیان بۆ هاتنی من چـــــاوەڕێ
دڵنیا بە، بەسیەتی، بۆ دەنگی دەرگا مەگرە گوێ

من دەمێکە جەرگی سووتاندووم هەناسەی سەردی گەل
دڵپڕی کردووم خەمی دەسکورتی و ڕەنگی زەردی گەل

من کوری کوردی شەهیدی ڕێیی خەباتم دایە گیان
کـــــــۆتری خوێنینی پەری باخی وڵاتم دایە گیان

من له شاری خوم غەریب و بو هه مو بیگانه خوم
کوتری کوژراوی ریگای لانه خوم,بی لانه خوم

دایه گیان بگری له سر خاکم  که وا شینم ده وی
زور بگریه دایه گیان فرمیسکی خوینینم ده وی

:::::::::::::::::::::::::::::::::::::::::::::::::::::::

ملوانکەی شین: دیل

وەکوو ئاوی بنی گۆمێ کە جێمابێ لە رووبارێ
وەکوو بەردی سەری شاخێ کە دانرابێ لە دیوارێ
وەکوو کاتێ گەڵای زەردێ دەسی بەربێ لە سەر دارێ
دڵم تەنگە لە تەنیایی نە ھاوڕازێ نە خەمخوارێ
من ئەو بەردەی گرفتارم، کە دیلی چینی دیوارم
من ئەو ئاوەی بنی گۆمم کە جێماوم لە رووبارم
گەڵای زەردم، مەلێ پیرم، منم دڵداری زنجیرم
لە بیرم دێ کە سی ساڵە لە بەندیخانە یەخسیرم
لە تاریکی ژیانم دا لە سووچی سەردی زیندانا
بە مۆرەی بەردی ناکامی بە جارێ عومری خۆم دانا
بەڵێ ئەو ساتە لاوێ بووم وەلێ ئێستا وەھا پیرم
ھەیە جارێ بەسەرھاتی خەمینی خۆم نییە بیرم
قەرەوڵ دێت و رادەبرێ، شەوانی عومرم ئەژمێرێ
شەوێکیش وا منی دیل، بە دەستی مردن ئەسپێرێ

:::::::::::::::::::::::::::::::::::::::::::::::::::::::::